Ярузэльскі ня будзе адказваць перад судом

Генэрал Войцех Ярузэльскі ня будзе адказваць перад судом за ўвядзеньне ў 1981 годзе ваеннага становішча ў ПНР ды забойства некалькіх дзесяткаў чалавек падчас пратэстаў рабочых у Гдыні, Гданьску й Шчэціне ў 1970 годзе.

Экспэрты вырашылі, што 89-гадовы былы лідар ПНР з-за дрэннага стану здароўя „хранічна няздольны” ўдзельнічаць у абедзьвюх справах, - заявіў прэс-сакратар Варшаўскага суду Войцех Малэк.

Нагадаем, генэрал Войцех Ярузэльскі ўвёў ваеннае становішча ў Польшчы 13 сьнежня 1981 году. Яно было адмененае 22 ліпеня 1983 году. За гэты час жыцьцё страцілі каля 100 чалавек. Тысячы апазыцыянэраў былі арыштаваныя ці выкінутыя з працы.

Увядзеньне ваеннага становішча азначала увядзеньне камэнданцкай гадзіны, адключэньне тэлефонаў, прыпыненьне выхаду прэсы, забарону страйкаў і дэманстрацыяў ды дзейнасьці грамадзкіх арганізацыяў, асацыяцыяў і прафсаюзаў.

У сваю чаргу, ў выніку падаўленьня пратэсту рабочых на ўзьбярэжжы ў 1970 годзе загінулі больш за 40 чалавек, звыш тысячы былі раненыя, больш за 3 тысячы затрыманыя.

аз