Толькі 6 дэпутатаў прагаласавалі супраць новых правілаў прызыву

Толькі 6 дэпутатаў прагаласавалі супраць новых правілаў прызыву, чытаем на сайце Белсату.

Учора Палата прадстаўнікоў прагаласавала ў першым чытанні за змены ў заканадаўства аб прызыве. Наперадзе яшчэ другое чытаньне, потым разгляд у Савеце Рэспублікі і подпіс Лукашэнкі. Але, паколькі законапраект урадавы, яго разглядаюць у тэрміновым надзвычайным парадку. Часу да канчатковага зацьвярджэньня мала: хутчэй за ўсё, толькі 10 дзён. А гэта значыць, што восеньскі прызыў пройдзе ўжо паводле новых правілаў.

За адзін дзень пад пэтыцыяй супраць законапраекту падпісалася 10 тысячаў чалавек. Аднак, для Палаты прадстаўнікоў подпісы грамадзянаў, сабраныя ў рэкордны тэрмін, – не аргумэнт.

Пэтыцыю, скіранавую супраць прыняцьця законапраекту, учора падпісалі ажно 10 тысячаў чалавек. Чалец Палаты прадстаўнікоў Ігар Мартынаў пракамэнтаваў гэты факт такім чынам:

«Што такое 10 тысячаў чалавек ад агульнае колькасьці насельніцтва? У мяне іншая інфармацыя. Я ведаю, што [у нас] больш за 40 % тых, хто хоча служыць у войску».

Ігар Мартынаў таксама дадаў, што закон не страшны: маўляў, паступіў ва ўнівэрсытэт пасьля вучэльні, павучыўся два месяцы – вазьмі акадэмічны адпачынак, схадзі ў армію.

У адрозьненьне ад кантрактнага войска, у Беларусі служба ў прызыве ў працоўны стаж не ўваходзіць.

яс