У Расеі пачнецца продаж беларускіх Geely

У Расеі пачнецца продаж поўнапрываднога красовэра пад маркай Geely беларускай вытворчасьці.

Як паведамляе партал autonews.ru, дызайн кросовэра Atlas ствараў Пітэр Хорбер, які раней супрацоўнічаў з Volvo. У аўто будзе панарамны люк і храмаваная рашотка радыятара. Дадзеных па рухавіку пакуль няма - у Кітаі ў аналягічнага аўто магутнасьць матора складае 184 конскія сілы. Інфармацыі аб кошце машыны таксама пакуль няма.

Пра тое, што першыя аўтамабілі завода „БелДжы” могуць зьявіцца ў продажы ўжо ў лістападзе, паведаміў журналістам 14 верасьня міністар прамысловасьці Беларусі Віталь Воўк.

Акцыянэрамі „БелДжы” зьяўляюцца ААТ „БелАЗ” (51,49%), Zhejang Jirun Automobile Co., Ltd (33,47%), СЗАТ „Саюзаўтатэхналогіі” (9,01%) і CITIC International Investment Limited (6,03%). У 2015 годзе паміж Барысавам і Жодзіна пачалося будаўніцтва новай пляцоўкі па выпуску аўтамабіляў. Для рэалізацыі праекту выдзелены кітайскі крэдыт на 158,7 млн даляраў ЗША. Агульны аб'ём інвэстыцый складзе 400 млн эўра.

паводле рацыя/белапан/вс