Вытворчасьць грузавікоў і аўтобусаў скарацілася за год удвая

Белстат апублікаваў штогадовы статыстычны зборнік «Транспарт і сувязь». У ім прыводзяцца дадзеныя аб вытворчасьці транспартных сродкаў. У 2015 годзе беларускія заводы скарацілі выпуск кожнага зь відаў.

Найбольш эканамічны крызыс ударыў па грузавых вагонах. Іх вытворчасьць абвалілася больш чым у 5 разоў – з 1510 да 299 вагонаў.

Беларускія матацыклы таксама аказаліся незапатрабаванымі. За апошнія тры гады іх вытворчасьць скарачалася наступнымі тэмпамі: 12183 – 6477 – 1540.

Удвая менш сталі вырабляць грузавікоў, сярод якіх і знакамітыя БелАЗы (з 12715 да 6373), і аўтобусаў (з 1672 да 881).

Выпуск тралейбусаў скараціўся ня так значна – са 106 да 98.

Менш сталі вырабляць і легкавікоў – з 9649 да 8651. Аднак у параўнаньні з папярэднімі гадамі гэта высокія лічбы. Раней у Беларусі зьбіралі ўсяго некалькі сотняў легкавікоў на год.

наша ніва/вс