Дзеці робяць жанчын больш асьцярожнымі

У адрозьненьні ад жанчын, мужчыны не адмаўляюцца ад рызыкоўных паводзінаў у прысутнасьці дзяцей, - сьцьвярджаюць брытанскія навукоўцы на старонках выданьня „Evolution and Human Behavior”.

Група псыхолягаў з Варвіцкага ўнівэрсытэта правярала паводзіны студэнтаў: 40 мужчын і 40 жанчын. Падчас экспэрымэнту яны гулялі ў азартную гульню самі, альбо са здымкам асобы, зь якой мелі падзяліцца выйгрышам. На здымку былі прывабны мужчына, жанчына альбо дзіцё.

Назіраючы за гатоўнасьцю прымаць рызыкоўныя рашэньні, навукоўцы зрабілі выснову, што ў выпадку студэнтак здымак дзіцяці павялічваў асьцярожнасьць.

На мужчын здымкі дзяцей моцна не ўплывалі. Студэнты, якія бачылі здымак прывабнага мужчыны, рызыкавалі часьцей.

Паводле навукоўцаў, гэта пацьвярджае факт, што па эмацыйных рысах жанчыны менш схільныя рызыкаваць. Гэта з мэтай ахоўваць дзяцей. У сваю чаргу мужчыны рызыкуюць і спаборнічаюць, каб павялічыць свой статус ды шанец на размнажэньне.

аз