Партрэт польскага багача

Партрэт польскага багача – пад такім загалоўкам «Dziennik Gazeta Prawna» піша пра расслаеньне ўзроўню даходаў у Польшчы. Міністэрства фінансаў правяло аналіз няроўнасьці ў даходах у розных рэгіёнах краіны. Аказалася, што найбольш самых багатых людзей, але таксама і самых бедных, пражывае ў цэнтры дзяржавы, у Мазавецкім ваяводзтве.

Меркаваньнем эканаміста з Варшаўскага ўнівэрсытэту Міхала Бжэзіньскага, гэта вынік кантрасту паміж багатай Варшавай і беднай іншай часткай Мазовіі. У сталіцы плаціць падаткі найбольш мільянэраў (каля адной чацьвёртай з 20 тыс. чалавек). На другім полюсе знаходзіцца Шыдлавецкі павет, у якім беспрацоўе складае 24%.

Самай эгалітарнай часткай Польшчы зьяўляецца Сылезія. Найбольш працоўных месцаў дае там вуглездабываючая галіна, дзе параўнальна высокія заробкі, таму і расслаеньне даходаў адносна невысокае.

Паводле дадзеных мінфіна, адна дзясятая палякаў, якія атрымліваюць самыя высокія заробкі, мае ў сваім распараджэньні амаль 41% усяго даходу падаткаплатнікаў. Паводле дадзеных эканамістаў, абсалютныя багачы. Гэта значыць, 1% самых багатых людзей, кантралююць каля 14% даходаў падаткаплатнікаў.

Dziennik Gazeta Prawna/нг