У палове польскіх школ няма добрых аптэчак

Мэдсёстры ня рвуцца працаваць у польскіх школах. Нярэдка здараецца, што адна мэдсястра абслугоўвае некалькі адукацыйных устаноў. Тым часам Міністэрства аховы здароўя працуе над законапраектам пра школьную мэдыцыну – паведамляе «Gazeta Polska Codziennie».

Школьныя мэдсёстры, гэтак званыя гігіеністкі, чакаюць зьменаў у законах з таго часу, калі прэм’ер-міністра Бэата Шыдла заявіла, што ў школах зноў паявяцца мэдычныя кабінэты.

Пакуль што мэдсёстры не сьпяшаюцца ісьці працаваць у школы. Прычын нямала – адзначае віцэ-старшыня Польскай асацыяцыі мэдсясьцёр школьнай мэдыцыны Малгажата Пеяк. Па-першае, агулам у краіне не хапае мэдсясьцёр. Па-другое, каб працаваць у школе, трэба мець два гады працоўнага стажу. І, па-трэцяе, прайсьці адмысловы курс, за які трэба заплаціць з уласнай кішэні.

Калі ўрад прыме новы закон пра школьную мэдыцыну, то муніцыпальныя органы, якія адказваюць за школьніцтва, павінны будуць наладзіць у школах мэдычныя кабінэты і прыняць на працу мэдсясьцёр.

Цяпер жа ня ўсе школьнікі могуць разьлічваць на дапамогу, калі здарыцца нейкі выпадак. Кантроль паказаў, што амаль у палове школ няма нават адпаведна падрыхтаванай аптэчкі першай неабходнасьці.