Вандроўкі сэрца Фрыдэрыка Шапэна

Неўзабаве будуць 207 угодкі з дня нараджэньня Фрыдэрыка Шапэна. З гэтай нагоды «PolskaTheTimes» нагадвае пакручастыя лёсы сэрца кампазытара, якое, паводле яго апошняй волі, было прывезена з Франыі ў Варшаву.

Шапэн памёр 17 кастрычніка 1849 году. Доктар Жан Крувэе (Jean Cruveilhier) выняў сэрца, паклаў у слоік і заліў каньяком. У сталіцу сэрца патаемна прывезла старэйшая сястра кампазытара Людвіка Енджэевіч (Ludwika Jędrzejewicz) у студзені 1850 году. Слоік з каштоўным органам нейкі час знаходзіўся ў кватэры Енджэевічаў у Варшаве. Потым яго аднесьлі ў прыхадзкі касьцёл Сьвятога крыжа. Пробашч неахвотна прыняў «падарунак», тым больш, што Фрыдэрык Шапэн ня быў вельмі рэлігійным чалавекам.

Сэрца Шапэна было годна пахавана толькі ў 1879 годзе, калі малодшая сястра Ізабэля Барціньска аб’явіла грамадзкі збор сродкаў на магілу ў касьцёле, якую прыкрыла дошка з надпісам «Фрыдэрыку Шапэну – Суайчыньнікі».

Падчас Другой сусьветнай вайны сэрца трапіла ў рукі фашыстаў, якія аддалі яго каталіцкім сьвятарам і распаўсюджвалі інфармацыю аб гэтым, як доказ нямецкай гуманнасьці. Затым сэрца Шапэна захоўвала ў сябе дома піяністка й старшыня Каталіцкага таварыства жанчын Марыя Фіндэнсэй.

17 кастрычніка 1945 году сэрца зноў было перададзена народу і вярнулася ў касьцёл Сьвятога крыжа ў Варшаве.

У 2014 годзе кардынал К.Ныч дазволіў правесьці абсьледаваньне сэрца кампазытара. Аказалася, што праз 150 гадоў орган знаходзіцца ў вельмі добрым стане. Ненатуральна вялікае і белае сэрца, з бачнымі сьлядамі пасьля сухотаў. Чарговы агляд заплянаваны на 2064 год.

яс