Заканчваецца сэзон на трускаўкі

Заканчваецца сэзон на трускаўкі (клубніцы). Ён быў карацейшы за мінулы год і, на жаль, не такі багаты як папярэднія сэзоны. У пункты прыёму дастаўляюць апошнія партыі гэтых пладоў.

Паводле слоў прэзыдэнта Асацыяцыі польскіх садаводаў Міраслава Малішэўскага, асноўнай прычынай сёлетняга меншага ўраджаю зьяўляецца дрэннае надвор’е. «Да гэтага прычынілася ў значнай ступені сёлетняя засуха. Трускаўка вельмі дрэнна рэагуе на недахоп вады, таму што мае неглыбокую каранёвую сыстэму. Такім чынам, у гэтым годзе мы атрымалі меней пладоў», – адзначае старшыня асацыяцыі.

Меншы запас трускаўкі прывёў да росту коштаў: у канцы сэзона цана за кіляграм трускавак дасягае 10 злотых (больш за 2 эўра).

У Польшчы кожны год зьбіраецца 150–200 тысячы тон трускаўкі. Гэта адна пятая частка ад усёй вытворчасьці Эўрапейскага Зьвяза.
А нашым радыёслухачам мы раім хутчэй запасьціся гэтай сьпелай ягадай, каб нават у зімку кубачак гарбаты з трускаўкавым варэньнем мог нагадаць вам аб летняй сьпякоце.

кд