Вяртаньне Міс Іраку

У Багдадзе былі праведзеныя першыя за 40 апошніх гадоў выбары Міс Іраку. Каралевай прыгажосьці стала 20-гадовая зялёнавокая студэнтка эканомікі з Кіркуку Шаіма Касім (Shaima Qassim).

Самую прыгожую жыхарку Ірака апошні раз выбіралі ў 1972 годзе. Пазьней засьцярогі наконт „шоў - абразы грамадзкай маралі” уносіў як рэжым Садама Хусэйна, так рэлігійныя радыкалы.

Невялікія конкурсы прыгажосьці былі арганізаваныя на мясцовым узроўні або ў рамках прасоўваньня нейкай кампаніі, але іх пераможцы не маглі ўдзельнічаць у выбарах Міс Сьвету.

Асаблівыя засьцярогі, як заўсёды, выклікала частка шоў у касьцюме бікіні, што для арабскіх кансэрватараў на самай справе зьяўляецца поўнай галізнай. Канчаткова арганізатары конкурсу адмовіліся ад гэтага элемэнту, падобным чынам, як ад пачастунку з алькаголем.

Аднак праблем не ўдалося пазьбегчы. У кастрычніку ісламісты сталі пагражаць арганізатарам зьдзяйсьненьнем тэракту ў гатэлі, дзе меліся адбыцца выбары. У гэткай сытуацыі ад удзелу ў конкурсе адмовіліся больш за дзесяць удзельніц выбараў.

Шаіма Касім заявіла, што „яна ня дасьць сабе запалохаць, паколькі краіна патрабуе нармальнасьці й радасьці”. Жанчына дадала, што ў барацьбе зь Іслямскай дзяржавай загінулі яе два браты, якія служылі ў ірацкай паліцыі.

Wprost/аз