Беларускія гоншчыкі на "Дакары"

Ралі-рэйд праходзіць з 4 па 17 студзеня па тэрыторыі трох краін — Аргентыны, Балівіі і Чылі. Экіпажы стартавалі і будуць фінішаваць у Буэнас-Айрэсе. Працягласьць трасы перавысіць 9 тыс. кілямэтраў, а некаторыя ўчасткі пройдуць на вышыні звыш 3,5 тыс. мэтраў.

Удзельнікі беларускай каманды на самалёце дабраліся да Буэнас-Айрэса, дзе некалькі дзён чакалі пачатку гонкі.

Усяго ад Беларусі на ралі-рэйд накіраваліся прыблізна 30 чалавек, у тым ліку гоншчыкі, штурманы, мэханікі і спартовы мэдык. Склад пілётаў не зьмяніўся: кіруюць спартовымі грузавікамі Сяргей Вязовіч, Аляксандар Васілеўскі і Аляксандар Палішчук.

Раней, перад прыездам гульцоў, у Паўднёвую Амэрыку на караблі былі адпраўленыя іх спартовыя грузавікі, якія каманда пераняла 30 сьнежня.

На ралі беларуская каманда выстаўляе тры грузавікі — два асноўныя экіпажы і "хуткую тэхнічку". Асноўная задача апошняй — дапамагаць двум іншым экіпажам падчас гонкі пры паломках.

Як паведамілі ў камандзе, на "Дакары" беларусы разьлічваюць трапіць у першую дзясятку. МАЗ сёлета дапрацаваў аўтамабілі для ралі-рэйда: канструкцыі сталі лягчэйшымі, рухавікі — мацнейшымі. У прыватнасьці грузавік пад кіраваньнем Сяргея Вязовіча скінуў 150 кіляграмаў вагі і атрымаў абноўлены матор на 912 конскіх сіл. Каманда таксама пастараецца выйграць час за кошт хуткасьці атрыманьня інфармацыі і надзейнай сувязі — velcom забясьпечыць беларусам бясплатны роўмінг.

"МАЗ-СПОРТаўта" выступае на "Дакары" ўжо ў чацьвёрты раз.

Уладальнік каманды — Менскі аўтазавод, тэхнічны партнэр — апэратар velcom.

БелаПАН/эб