Срэбра Тацяны Драздоўскай

Лідарка нацыянальнай каманды Беларусі па ветразевым спорце ў алімпійскім клясе яхт „Лазер-Радыял” Тацяна Драздоўская заваявала срэбную ўзнагароду на этапе Кубку сьвету ў аўстралійскім Мэльбурне. Па выніках дзевяці праведзеных гонак Тацяна Драздоўская набрала 36 ачкоў. Яна вельмі пасьпяхова правяла ўсю кваліфікацыйную сэрыю. Пасьля стартавых чатырох гонак беларуска ўтрымлівала першую пазыцыю і саступіла лідарства спартоўцы зь Вялікабрытаніі Элісан Янг толькі пасьля пятай гонкі.

Да фінальнай сэрыі, да ўдзелу ў якой дапускаюцца толькі 10 спартовак па выніках кваліфікацыі, Драздоўская падыйшла на другім месцы з сумай 30 ачкоў, захаваўшы шанцы на ўзнагароду вышэйшай пробы. У вырашальных мэдалёвых спаборніцтвах, дзе сума ачкоў падвойваецца, ёй удалося прыйсьці да фінішу толькі восьмай, а Янг апынулася другой, стаўшы недасягальнай для суперніц па выніках ўсёй рэгаты. Бронза спаборніцтваў дасталася нарвэжцы Ліне Флем Хост.

Другое месца Тацьцяны Драздоўскай на этапе Кубку сьвету дазволіла Беларусі выйсьці на 4-ы радок мэдалёвага заліку Міжнароднай фэдэрацыі ветразевага спорту, які вядзецца па выніках выступаў прадстаўніц розных краін у клясе яхт „Лазер-Радыял” на этапах і ў фінале Кубку сьвету.

racyja.com/эб