Птушыны бізнэс

Польшча зьяўляецца раем для замежных назіральнікаў за птушкамі. Таксама павялічваецца колькасьць мясцовых аматараў птушак, а турыстычная галіна пачынае карыстацца гэтым усё больш адважна, паведамлее „Wprost”.

Назіральнікі за птушкамі гатовыя пераехаць нават некалькі сотняў кілямэтраў, каб пабачыць нейкую птушку, альбо й не, паколькі такой гарантыі ніколі няма. „Гэта нармальная справа”, - кажа аўтар старонкі „Birding in Poland”, 33-гадовы Міхал Завадзкі з Аполя. Ён займаецца назіраньнем за птушкамі ўжо 20 гадоў, з часу, калі бабуля Яніна ўпершыню завяла яго ў заапарк.

Сёньня ён падарожнічае па сьвеце ў пошуках новых відаў птушак. З гэтай мэтай ён пабываў, сярод іншага, у Ізраілі, Грузіі, Марока, Турцыі.

Каб пабачыць канкрэтны від птушкі, ён гатовы чакаць у хованцы больш за 10 гадзін.

Падобных яму аматараў у Польшчы прыбывае кожны год. Зараз яны складаюць больш за дзесяць тысяч чалавек. Арнітолягі-аматары выдаюць за вясну й лета па больш за 10 тысяч злотых на арніталягічныя паездкі. Замежныя госьці гатовыя заплаціць яшчэ больш, і гэтым карыстаецца польскі турызм.

За арганізаванае турагенцтвам тыднёвае назіраньне за птушкамі ў суправаджэньні прафэсійнага арнітоляга трэба заплаціць нават тысячу эўра. Аднак іншаземцаў гэтыя цэны не палохаюць, паведамляе „Wprost”.

аз