east news
Генэральны пракурор Польшчы плянуе памяняць працэдуры перадачы інфармацыі беларускай пракуратуры, а МЗС абяцае дапамогу Алесю Бяляцкаму.
Прадстаўнікі абодвух ведамстваў удзельнічалі ўчора позным вечарам у супольным паседжаньні Сэймавай Камісіі па справе сувязяў з палякамі замежжа й Сэймавай камісіі замежных справаў.
Адмысловае паседжаньне абедзьвюх камісіяў прайшло ў сувязі зь нядаўнім інцыдэнтам, які адбыўся ў польскай пракуратуры. Гаворка ідзе пра перадачу беларускаму боку дадзеных аб банкаўскіх рахунках праваабаронцы Алеся Бяляцкага.
Генпракурор Польшчы Анджэй Сэрэмэт хоча цэнтралізаваць працэдуры абмену дакумэнтамі зь іншымі краінамі. У прыватнасьці, гаворка ідзе пра скасаваньне польска-беларускага паразуменьня, якое дазваляе мяняцца дакумэнтамі непасрэдна паміж акруговымі й раённымі пракуратурамі ў Польшчы й Беларусі.
Спыненьне згаданай дамовы прывяло б да цэнтралізацыі працэдуры – усе заявы з просьбай аб юрыдычнай дапамозе з боку Беларусі разглядала б выключна Генэральная пракуратура.
Паводле Анджэя Сэрэмэта, падчас учарашняй нарады ўсе дэпутаты былі згодныя, што ёсьць падставы дзеля ажыцьцяўленьня згаданага кроку.
Анджэй Сэрэмэт: Па гэтай справе Генпракуратура пачне адпаведныя перамовы з МЗС і Міністэрствам юстыцыі. Гаворка ідзе пра тое, што падобнае паразуменьне між Польшчай і Беларусьсю датычыць таксама абмену інфармацыяй паміж судамі абедзьвюх краінаў. Таму, калі б сапраўды дайшло да скасаваньня дамовы, добра было б каардынаваць абедзьве працэдуры.
Анджэй Сэрэмэт паведаміў таксама, што ў 2009 годзе Польшча задаволіла 14 заяваў з просьбай аб юрыдычнай дапамозе, перададзеныя беларускім бокам. Тым ня менш усе яны, апрача скандальнай справы Алеся Бяляцкага, не датычылі беларусаў, заангажаваных у апазыцыйную дзейнасьць, - гарантаваў Галоўны пракурор Польшчы.
Анджэй Сэрэмэт: Няма ніякіх падставаў, сьцьвярджаць, што іншыя заявы беларускага боку, апрача справы А. Бяляцкага, датычылі прадстаўніка беларускай апазыцыі ды маглі выкарыстоўвацца дзеля перасьледу за апазыцыйную дзейнасьць. Генпракуратура ў межах сваіх паўнамоцтваў праверыла гэта падрабязна.
- сказаў Генпракурор Польшчы Анджэй Сэрэмэт.
Віцэ-старшыня Сэймавай камісіі замежных справаў, кіраўнік Парлямэнцкай групы па справах Беларусі Робэрт Тышкевіч (Грамадзянская плятформа) падкрэсьліў, што справа Алеся Бяляцкага пахіснула аўтарытэт Польшчы, дзяржавы заангажаванай у падтрымку дэмакратыі.
Робэрт Тышкевіч: Пакуль цяжка ацаніць наступствы згаданага дзеяньня. Можна толькі сказаць, што яны будуць сур’ёзныя. Перш за ўсё, гаворка ідзе пра верагоднасьць Польшчы, дзяржавы, якая зьяўляецца бясьпечным портам для ўсіх, хто змагаецца за дэмакратыю. Трэба кампэнсаваць Алесю Бяляцкаму, ягонай сям’і й бліжэйшым супрацоўнікам гэтую крыўду. Польшча мае гэткі маральны абавязак, таму што, на самой справе, выдала яго ў рукі КДБ.
- лічыць Робэрт Тышкевіч.
У паседжаньні абедзьвюх сэймавых камісіяў удзельнічаў таксама віцэ-міністар замежных справаў Кшыштаф Станоўскі. Пасьля сустрэчы ён абяцаў, што МЗС будзе старацца кампэнсаваць шкоду, якую Польшча нанесла беларускаму праваабаронцу.
Кшыштаф Станоўскі: Урон быў нанесены ды Польшча павінна яго кампэнсаваць. Гэтым несумненна павінна заняцца Міністэрства замежных справаў. Якім чынам гэта адбудзецца? Пра гэта ня будзем гаварыць публічна. Тым ня менш, ад імя міністэрства я хачу сказаць: мы будзем рабіць усё, што зможам.
- запэўніваў віцэ-міністар замежных справаў Кшыштаф Станоўскі.
Нагадаем, Алесь Бяляцкі быў затрыманы 4 жніўня, пасьля таго як летувіскае Міністэрства замежных справаў ды, як высьветлілася пазьней, таксама польская пракуратура перадалі беларускаму боку дадзеныя пра банкаўскія рахункі кіраўніка праваабарончага цэнтру „Вясна”. Сродкі, якія на іх знаходзіліся, выкарыстоўваліся дзеля дапамогі палітзьняволеным у Беларусі.
З заклікам вызваліць Алеся Бяляцкага да беларускіх уладаў зьвярнуліся вядомыя заходнія палітыкі ды міжнародныя арганізацыі. Яны зьвярталі ўвагу, што беларускія праваабаронцы вымушаныя карыстацца замежнымі рахункамі, паколькі ўлады ў Менску пастаянна адмаўляюцца іх зарэгістраваць на тэрыторыі Беларусі.
За высунутыя абвінавачваньні (утойваньне даходаў у асабліва буйных памерах) Алесю Бяляцкаму пагражае да 7 гадоў пазбаўленьня волі з канфіскацыяй маёмасьці.
аз