У Польшчы мароз, а ў Панаме тэмпэратура ў гэтыя дні даходзіць да 30 градусаў у ценю. У такой гарачай атмасфэры краіна Цэнтральнай Амэрыкі прымае гасьцей 34-ых сусьветных дзён моладзі. Чакаецца, што ў Панаму прыедзе нават 750 тыс. маладых католікаў з усяго сьвету.
Сусьветныя дні моладзі – гэта самая буйная міжнародная сустрэча хрысьціянскіх вернікаў, маладых католікаў. Яна адбываецца кожны год, і кожны год моладзь з усяго сьвету прымае іншая краіна. Два з паловай гады таму сотні тысяч маладзёнаў наведалі Польшчу, мерапрыемства прайшло зь вялікім посьпехам, расславіла горад Кракаў на ўвесь сьвет. Цяпер панамцы прымаюць у сябе веруючых маладзёнаў. Для жыхароў Эўропы гэта сур’ёзнае падарожжа, на якое многія жадаючы паехаць у Амэрыку ашчаджалі доўгі час. І ўрэшце іх мара споўнілася. Гавораць маладыя жыхары горада Катавіцэ, якія надоечы адправіліся ў Панаму.
Удзельнікі сусьветных дзён моладзі: Сустрэча ў адным месцы столькіх людзей адной веры – гэта проста цудоўна. Удзел у Сусьветных днях моладзі дае вялізную колькасьць энэргіі, жаданьня дзейнічаць, рабіць нешта для іншых, вяртае веру.
Я хачу ўбачыць папу рымскага, пазнаёміцца з файнымі людзьмі. Там ёсьць магчымасьць пазнаёміцца з мноствам цікавых людзей з усяго сьвету, так што павінна быць цудоўна.
Авіяпадарожжа ў Панаму працягваецца больш за 10 гадзін, але гэта не перашкода для тых, хто марыць сустрэцца з папам рымскім Францішкам. Папа прыбудзе на Сусьветныя дні моладзі ў сераду 23 студзеня.
У сусьветных днях моладзі будзе ўдзельнічаць каля 3,5 тыс. палякаў. Гэта самая вялікая група паломнікаў з Эўропы. 150 удзельнікаў сустрэчы прыбудзе ў Панаму на борце легендарнага польскага парусьніка «Дар моладзі», які знаходзіцца цяпер у рэйсе вакол сьвету з нагоды 100-годзьдзя незалежнасьці польскай дзяржавы. 22 студзеня «Дар моладзі» кіне якар у порце Бальбоа. Гэта не адзіны парусьнік з моладзьдзю на борце, але польскае судна плянуе ўвайсьці ў порт пад поўнымі ветразямі, што выглядае выключна прыгожа і робіць вялікае ўражаньне. Канешне, такі эфэктны ўваход будзе магчымы, калі дазволяць умовы надвор’я.
Матэвуш Мэйза нядаўна вярнуўся з рэйсу на борце «Дару моладзі», а цяпер адправіўся ў Панаму на Сусьветныя дні моладзі. Матэвуш расказвае, што для яго самае важнае падчас знаходжаньня ў Панаме.
М. Мэйза: Знаёмства з людзьмі з усяго сьвету, новыя сябры, але таксама знаёмства з новымі, цікавымі месцамі. Панама – гэта далёкая краіна, там жыцьцё выглядае інакш. Цікава пазнаёміцца з новымі людзьмі і новымі месцамі, а таксама ўбачыцца з былымі калегамі з «Дару моладзі». Я спадзяюся, што «Дар моладзі» будзе стаяць дзесьці ў цэнтры горада, у добрым месцы, каб магло яго ўбачыць як мага больш людзей.
Сусьветныя дні моладзі і сустрэча з папам Францішкам зьяўляюцца кульмінацыйным момантам Рэйсу незалежнасьці. Сустрэча маладых католікаў працягнецца да 27 студзеня, а «Дар моладзі» выйдзе з порту Панамы 28 студзеня. Моладзь на борце судна рыхтуецца да сустрэчы з папам рымскім. З самага пачатку рэйсу на борце знаходзяцца сьвятары, якія праводзяць з маладымі маракамі гутаркі на тэму веры. З Панамы «Дар моладзі» адправіцца ў Калюмбію, дзе маладыя палякі сустрэнуцца з місіянэрамі і падапечнымі дому для беспрытульных дзяцей, якім кіруюць польскія сьвятары.
нг