Амэрыканскія кангрэсмэны выклікалі на дачу паказаньняў стваральніка Фэйсбуку

Учора амэрыканскія кангрэсмэны другі раз выклікалі на слуханьні стваральніка Фэйсбуку – піша “Gazeta Wyborcza”. Гэта быў ужо другі дзень дачы паказаньняў Марка Цукэрбэрга, пытаньні якому задавалі між іншым чальцы камітэту па энэргетыцы і гандлю. Непасрэднай прычынай выкліку быў скандал вакол Cambridge Analytica, калі аказалася, што кампанія зьбірала дадзеныя карыстальнікаў Фэйсбуку, каб пазьней выкарыстаць іх у палітычнай рэкляме.

Сацсеткам пагражае ўвядзеньне жорсткіх нормаў, якія могуць значна абмежаваць іх свабоду. Гэтая пагроза была важнейшай прычынай прыбыцьця Цукербэрга ў Кангрэс. Ён падкрэсьліваў, што не зьяўляецца ворагам рэгуляваньня працы сацсетак. Але ўсё залежыць ад таго, якая гэта будзе рэгуляцыя. Яму нагадалі, што Фэйсбук не спраўляецца са складанымі справамі: кібэрзлачыннасьцю, фэйк ньюсамі і праднамеранай маніпуляцыяй інфармацыйнымі зьвесткамі.

Фэйсбук зьбірае інфармацыю ня толькі пра сваіх карыстальнікаў, але нават пра тых людзей, у каго няма профілю ў сацсетцы. Існуе неабходнасьць нанава апрацаваць правілы дзейнасьці сацсетак. Марка Цукербэрга пыталі, ці існуе магчымасьць забраць з Фэйсбуку ўсе свае дадзеныя. Ён прызнаў, што няма такой магчымасьці.

Амэрыканскі рынак вельмі баіцца ўвядзеньня сур’ёзных зьмен у заканадаўстве. І таму некаторыя фірмы самі прымаюць адпаведныя крокі. Напрыклад, Twitter заявіў, што вырашыў увесьці The Honest Ads Act, гэта значыць права, прынятае некалькі месяцаў таму ў адказ на дзейнасьць Расеі ў сацсетках падчас прэзыдэнцкай кампаніі ў ЗША.

Калі аказалася, што расейскія тролі выкуплялі рэкляму-прапаганду на Фэйсбуку ў часе кампаніі, Сэнат падрыхтаваў законапраект больш жорсткага кантролю. Адно з патрабаваньняў – абавязак прадстаўляць інфармацыю пра ўсе даходы з рэклямы ў памеры больш чым 500 даляраў.

Gazeta Wyborcza/нг