Польшча безабаронная

Штодзёнка “Rzeczpospolita” піша пра абаронную здольнасьць краіны.

Газэта абапіраецца на ацэнцы ўплывовага генэрала Леона Камарніцкага. Ягоная ацэнка прагучала ў момант, калі ў Польшчы праходзяць шырокамаштабныя манэўры НАТО. Іх мэта – прадэманстраваць гатоўнасьць Альянсу да абароны Польшчы.

Аднак пакуль Польшча ня ў стане абараніць сябе. НАТО ў гэтым не дапаможа, бо яно ня можа замяніць уласныя высілкі ў справе ўмацаваньня сваёй абароннай здольнасьці, піша выданьне.

Асноўную праблему генэрал бачыць у кепскім разьмяшчэньні вайсковых гарнізонаў. Яны раскіданыя паблізу паўночнай, заходняй і часткова паўднёвай мяжы. Уздоўж усходняй мяжы на глыбіню 150 км ў напрамку Варшавы поўная “дзірка”. Газэта зазначае, што Войска Польскае павінна перасунуць часьці з Захаду бліжэй у цэнтар краіны, а з Поўначы адсунуць войскі ад мяжы з Расеяй.

Газэта крытыкуе таксама нежаданьне ўладаў утрымліваць у належным стане вайсковыя фартыфікацыі й падрыхтаваць новыя ўмацаваньні. У якасьці яшчэ адной памылкі называецца зацягваньне са стварэньнем Нацыянальнай гвардыі ў краіне.

Расклад сілаў Войска Польскага значна не зьмяніўся ў параўнаньні з часамі Варшаўскага Пакта, падсумоўвае польскае выданьне.

юл