Кінастужка „Іда” рэжысэра Паўла Паўлікоўскага атрымала „Оскара” - прэмію Амэрыканскай акадэміі кінамастацтва. Польскі фільм быў узнагароджаны ў катэгорыі „найлепшы фільм зьняты на іншай, чым ангельская мова”. 87-я цырымонія ўручэньня прэміі Амэрыканскай акадэміі кінамастацтва прайшла ў Лос-Анджэлесе.
Атрымліваючы ўзнагароду, рэжысэр Павал Паўлікоўскі зьвярнуў ўвагу на парадокс. „Мы зрабілі фільм пра неабходнасьць задумы й сузіраньня. А вось тут мы апыніліса ў цэнтры зацікаўленьня сьвету”, - сказаў шчасьлівы рэжысэр.
Ужо пасьля цырымоніі ён тлумачыў, што вельмі паважае гэтую ўзнагароду, але вялікае значэньне для яго маюць таксама іншыя ўзнагароды, перш за ўсё, прэмія Эўрапейскай кінаакадэміі.
Павал Паўлікоўскі: Гэта амэрыканская прэмія для амэрыканскіх фільмаў, а мы яе так перажываем, быццам бы не маглі ўявіць сабе безь яе жыцьцья. На эўрапейскіх кінафэстывалях гаворка ішла пра эўрапейскія фільмы. Там ўсе разумелі кантэкст, ведалі, пра што ідзе гаворка. Тут – гэта вялікі шоў-бізнэс, а мы такія маленькія… Тым ня менш, я, зразумела, цешуся.
Агата Тшэбухоўска, якая ў „Ідзе” сыграла галоўную ролю, пра тое, што фільм атрымаў „Оскара”, даведалася ў незвычайных абставінах.
Яна думала, што ўзнагароды ў катэгорыі, у якой быў намінаваны польскі фільм, будуць абвешчаны пазьней і разам з другой акторкай - Агатай Кулешай - выйшла з галоўнай залі.
Агата Тшэбухоўска: Мы выйшлі на калідор: у туалет і выпіць віна. У гэтым моманце аказалася, што былі абвешчаныя пераможцы ў „нашай катэгоры”. Так што мы засталіся на калідоры й цешыліся ля тэлевізара.
Агата Тшэбухоўска дадае, што пасьля ролі Ганны ў „Ідзе” ня мае ніякіх плянаў адносна сваёй акторскай кар'еры. Спачатку яна хоча закончыць ВНУ.
Для Агаты Кулешы – акторкі, якая ў фільме згуляла ролю цёткі Ванды, „Оскар” – гэта завяршэньне працы пры стужцы.
Агата Кулеша: Для мяне гэта заканчэньне прыгоды зь „Ідай”. Заканчэньне двухгадовага пэрыяду, калі мы займаліся гэтым фільмам, хоць у асноўным гэта Павал Паўлікоўскі падарожнічаў па сьвеце й прасоўваў стужку. Гэта вельмі прыгожы фільм, які сьвет заўважыў. Можна цешыцца, што гэтая прыгода закончылася першым „Оскарам” для польскага фільму.
Нагадаем, падзеі фільма адбываюцца ў 60-я гады. Паслушніца Ганна (Агата Тшэбухоўска) перад вечнымі абетамі едзе да сваёй цёткі Ванды (Агата Кулеша). Там будучая манашка даведваецца, што яна габрэйка, а яе сапраўднае імя Іда.
Цётка расказвае дзяўчыне, што ейныя бацькі былі забітыя падчас вайны, а яе аддалі ў манастыр.
„Гэта асаблівы дзень для ўсіх тых, хто хоча бачыць прагрэс, дасягнуты ў прасоўваньні Польшчы й польскай культуры за мяжой”. Так інфармацыю пра „Оскара” для польскага фільму пракамэнтаваў Браніслаў Камароўскі. Прэзыдэнт лічыць, што прэмія для стужкі „Іда” павінна быць крыніцай задавальненьня для ўсіх палякаў.
У сваю чаргу Артур Заборскі, журналіст, які займаецца кінамастацтвам, спадзяецца, што дзякуючы гэтай прэстыжнай узнагародзе „Іда” нарэшце спадабаецца таксама палякам.
Артур Заборскі: „Іда” сустрэлася з прыхільнасьцю гледачоў у Францыі ці ў ЗША. Тым часам у Польшчы, нягледзячы на тое, што стужка аказалася найбольшым посьпехам польскага кіно, яе паглядзелі толькі 109 тысяч гледачоў. Таму цяпер, калі стужка была ўзнагароджана таксама „Оскарам”, палякі павінны ісьці ў кіно, паглядзець фільм, сфармаваць сваю ацэнку.
„Іда” была таксама намінаваная ў катэгорыі „лепшая апэратарская праца”, але ў гэтай катэгорыі выйграў фільм „Birdman”, які таксама быў прызнаны лепшай стужкай мінулага году.
Стужка „Іда”, апрача прэміі Амэрыканскай акадэміі кінамастацтва, атрымала таксама больш за 10 іншых узнагародаў на прэстыжных конкурсаў і кінафэстывалях у Эўропе й сьвеце.
Камэнтатары нагадаюць таксама пра посьпех двух польскіх дакумэнтальных фільмаў, якія былі намінаваныя да „Оскара”, хоць канчаткова яго не атрымалі. Гаворка ідзе пра фільмы: „Яанна” (пол. Joanna) Анэты Копач і „Наш праклён” (пол. Nasza klątwa) Томаша Сьлівінскага, якія прайгралі амэрыканскай стужцы пра вэтэранаў вайны.
Штогадовая цырымонія ўручэньня прэміі Амэрыканскай акадэміі кінамастацтва, то бок самай прэстыжнай кінэматаграфічнай ўзнагароды ЗША, трансьлюецца ў дзясятках краін сьвету ў прамым этэры.
Адметнасьцю „Оскараў” зьяўляецца тое, што яны ўручаюцца па выніках усеагульнага галасаваньня чальцоў акадэміі, а не па выбары журы, як гэта адбываецца ў выпадку большасьці кінафэстываляў.
Кінапрэмія „Оскар” была заснаваная ў 1929 годзе адным з уладальнікаў кампаніі MGM Лазарам Маерам.
аз