Нават дрэнны шпіталь немагчыма закрыць

Узровень лячэньня і агулам сытуацыя ў службе аховы здароўя – гэта балючая тэма ў Польшчы, паколькі ў сыстэме хранічна не хапае сродкаў, яна дзейнічае ня так, як хацелі б жыхары краіны. «Dziennik Gazeta Prawna» паведамляе аб тым, што нават калі бальніца не адказвае стандартам, яе немагчыма закрыць. Амаль 1200 бальніц не ўвяло санітарных стандартаў, якія патрабуюцца дзяржаўнымі нормамі. У іх быў на гэта час да канца 2017 году. Тым ня менш, яны далей працуюць.

Каб іх не закрываць, Міністэрства аховы здароўя пераклала адказнасьць на санстанцыі. Калі кантралёры вырашаюць, што ўмовы ў дадзенай бальніцы не пагражаюць жыцьцю і здароўю пацыентаў, яны дазваляюць ёй працаваць. Да гэтае пары былі правераныя каля 800 устаноў аховы здароўя. У 164 былі зафіксаваныя сур’ёзныя парушэньні. Аднак толькі ў пяці выпадках былі закрытыя аддзяленьні або канкрэтныя палаты.

Ніхто не гарыць жаданьнем закрываць шпіталі. Па тэорыі, такое рашэньне павінны прымаць ваяводы, але яны не сьпяшаюцца гэта рабіць. На думку экспэртаў, у выніку нізкіх санітарных нормаў цяжка змагацца са шпітальнымі інфэкцыямі. У некаторых шпіталях у палатах няма халоднай і гарачай вады, мыла для мыцьця рук, у адной палаце ляжыць празьмерная колькасьць пацыентаў. Бальніцы мелі больш за 25 гадоў на павышэньне санітарных стандартаў, але многія гэтага не зрабілі.

Dziennik Gazeta Prawna/нг