TVP плянуе ўзяць гіганцкі крэдыт

Польскае грамадзкае тэлебачаньне TVP плянуе ўзяць велізарны крэдыт у памеры 800 млн злотых (больш за 188 мільёнаў 135 тысяч эўра). Пазыка будзе залежаць ад таго, ці ўрад падтрымае закон аб абанэмэнце, аўтарства Міністэрства культуры й нацыянальнай спадчыны, паведамляе „Dziennik Gazeta Prawna”.

На што TVP патрэбныя такія буйныя грошы? Верагодна, палова гэтай сумы пайшла б на інвэстыцыі ў сыстэму HD, мадэрнізацыю рэгіянальных аддзелаў і стварэньне буйной інтэрнэт-плятформы, а таксама на перавод архіваў у лічбавы фармат. Другая частка крэдыту прызначалася б на вытворчасьць фільмаў і сэрыялаў, у асноўным гістарычных.

Нагадаем, Міністэрства культуры й нацыянальнай спадчыны перадало праект закону аб абанэнцкай плаце на міжведамасныя кансультацыі на пачатку сакавіка.
Дакумэнт прадугледжвае павелічэньне спагнаньня абанэнцкай платы. У гэтым павінны дапамагчы апэратары кабэльнага й спадарожнікавага тэлебачаньня, якія рыхтавалі б сьпісы карыстальнікаў.

Апэратары павінны перадаць прадпрыемству Poczta Polska дадзеныя сваіх кліентаў і паведаміць ім пра абавязак рэгістрацыі радыёпрыёмнікаў і тэлевізараў, а таксама пра абавязак аплаты абанэнцкай платы.
Закон прадугледжвае амністыю для грамадзян, якія да гэтай пары не плацілі абанэмэнт.

Грамадзкае тэлебачаньне прадугледжвае, што крэдыт у памеры 800 мільёнаў злотых удалося б вярнуць на працягу шасьці гадоў. У сваю чаргу меркаваныя даходы ад абанэнцкай платы, то бок 1 мільярд 360 мільёнаў злотых (320 мільёнаў эўра) у год, павінны пераканаць Міністэрства фінансаў, што грамадзкае тэлебачаньне ў стане пагасіць гэткі крэдыт, паведамляе выданьне „Dziennik Gazeta Prawna”.

аз