У выніку аварыі на ЧАЭС найбольш пацярпела Беларусь

Чарнобыль – гэта сынонім найбуйнейшай ядзернай катастрофы ў Эўропе. Аднак у аварыі ўкраінскай атамнай электрастанцыі не Ўкраіна пацярпела найбольш. Вецер пагнаў радыеактыўныя хмары над суседнюю Беларусь й гэта на яе асела 70% сьмяротнага радыеактыўнага забруджаньня. Забруджаная была адна чвэрць тэрыторыі краіны. Выселеныя былі больш за 100 тысяч жыхароў забруджаных рэгіёнаў, наступныя 200 тысяч выехалі самастойна, а астатнія засталіся, паколькі ім не было куды зьехаць, нагадвае тыднёвік „Polityka”.

30 гадоў таму Сьвятлана Наджафава жыла ў невялікай вёсцы ў 27 кілямэтрах ад Чарнобыля ў настаўніцкай кватэры з мужам і дзьвюма дачушкамі. Верцы было 7 гадоў, а Аннушцы- 8 месяцаў. Сьвятлана гуляла зь імі на панадворку, на вясеньнім сонцы.

Напрыканцы красавіка з каштана нечакана асыпаліся лісты. „Што гэта такое?”, - задумоўвалася Сьвятлана. Курыцы хадзілі, як п’яныя. Гэта было нават сьмешна. Тым часам у радыё пастаянна гаварылі пра 1-га траўня. Вера й Аннушка штодзённа пілі сырое малако.

„Нам нічога не сказалі”, - успамінае жанчына. Яна задумоўваецца, ці калі б ейныя дочкі тады сядзелі дома, то таксама былі б прымушаны правесьці столькі месяцаў у шпіталях?. „Шчытападобная залоза, боль у касьцях, галаўны боль”, - пералічае яна.

Праз больш чым дзесяць дзён жыхароў вёскі выклікалі ў амбуляторыю. Узялі кроў, пазьней загадалі піць нейкае рэчыва. Суседзі пачалі шаптаць пра тое, што на ЧАЭС была аварыя й пажар. Пра тое, што загінулі людзі, беларускія журналісты даведаліся з Польшчы. На канец ім паведамілі, што дзеткі едуць у санаторый. Адзін санаторый, другі, трэці… Канчаткова ім дазволілі паехаць у Мазыр да бабулі. Праз тры гады Сьвятлана хацела паехаць дадому, забраць рэчы з кватэры, але ёй не дазволілі й заявілі, што там цяпер „мётрвая зона”, успамінае жанчына ў размове з выданьнем „Polityka”.

аз