Іранскае пахмельле

Іранскае Міністэрства аховы здароўя паведаміла пра адкрыцьцё 150 цэнтраў рэабілітацыі алькаголікаў. Паводле камэнтатараў, гэта сапраўдны прагрэс, паколькі яшчэ два гады таму ўлады гэтай краіны пераконвалі, што ў Іране алькаголікаў няма, нагадвае тыднёвік „Polityka”.

Цяпер іранскія ўлады прызнаюць, што ў краіне каля 200 тысяч грамадзянаў, залежных ад алькаголю. Неафіцыйныя статыстычныя дадзеныя паведамляюць пра больш чым мільён алькаголікаў.

Аднак праблема ня ў колькасьці. Паводле Сусьветнай арганізацыі здароўя, калі ўжо грамадзянін Ірану п’е алькаголь, то да непрытомнасьці – у сярэднім каля 25 літраў чыстага алькаголю ў год, то бок больш чым расеец.

Іслам забараняе спажываньне алькаголю. За гэта пагражае лупцоўка ды нават сьмяротнае пакараньне. Алькаголь могуць вырабляць толькі немусульмане й дзеля ўласнага карыстаньня.

Тым ня менш, устрымліваньне ад спажыцьця алькаголю - гэта для пэрсаў зусім новая традыцыя. Да рэвалюцыі 1979 году яны спажывалі алькаголь цягам 5 тысяч гадоў. Невыпадкова адна з найбольш папулярных вінаградных лоз называецца як і іранскі горад - Шыраз.

Аднак цяпер - у падпольных умовах - жыхары Ірану аддаюць перавагу моцнай гарэлцы - араку.

Многія іранцы тлумачаць, што яны п’юць па палітычных прычынах. Аднак колькасьць алькаголікаў хутка расьце й неўзабаве можа перавысіць колькасьць наркаманаў, якіх у Іране больш за 3 мільёны.

Хоць 150 цэнтраў для алькаголікаў у дзяржаве, якая налічвае 77 мільёнаў жыхароў, гэта няшмат, то ўлады зрабілі першы важны крок – прызналі, што праблема існуе, паведамляе тыднёвік „Polityka”.

аз