Дональд Трамп наведаў КНДР

30 чэрвеня на граніцы Паўночнай і Паўднёвай Карэі сустрэліся прэзыдэнт ЗША Дональд Трамп і старшыня Дзяржаўнага савета КНДР Кім Чэн Ын. У дэмілітарызаванай зоне паміж дзвюма карэйскімі дзяржавамі лідары паціснулі адзін аднаму рукі.

Дональд Трамп стаў першым дзеючым прэзыдэнтам ЗША, які ступіў на тэрыторыю КНДР. Трамп сказаў Кім Чэн Ыну: «Гэта гонар для мяне — сустрэцца з табой. Гонарам для мяне было таксама перасячэньне гэтай лініі, і я ганаруся, што перасёк гэту лінію. Я здагадваўся, што ты можаш гэта зрабіць. Я ня быў у гэтым упэўнены, але быў да гэтага гатовы. Хачу табе падзякаваць. Гэта было выдатна».

Прэзыдэнт ЗША назваў сустрэчу зь лідарам Паўночнай Карэі «вялікім днём для ўсяго сьвету» і адзначыў, што паміж імі завязваецца сяброўства. Дональд Трамп запрасіў Кім Чэн Ына ў Вашынгтон.

У сваю чаргу лідар КНДР заявіў, што будзе рады, калі Дональд Трамп наведае Пхеньян.

Пасля сустрэчы на граніцы кіраўнікі дзьвюх краін правялі перагаворы на паўднёвакарэйскім баку.

Гэта трэцяя сустрэча прэзыдэнта ЗША з кіраўніком КНДР. Амэрыканскі бок спадзяецца, што сустрэча можа дапамагчы вывесьці з тупіка перагаворы аб ператварэнні Карэйскага паўвострава ў бязьядзерную зону.

IAR/PAP/вк