Італьянскі ўрад выклікае занепакоенасьць Брусэля

Эўрапейская камісія чакае, што новы ўрад Італіі будзе старацца зьменшыць запазычанасьць краіны. Італія знаходзіцца на другім месцы ў Эўразьвязе па велічыні даўгоў. На першым – Грэцыя.

Камісар па фінансавых пытаньнях П’ер Масковісі ў інтэрвію італьянскай газэце "Il Sole24" падкрэсьліў, што сярод палітыкаў італьянскага кіраўніцтва, мабыць, ёсьць прыхільнікі выхаду з зоны эўра. У сваю чаргу камісар па справах бюджэту Гюнтэр Отынгер адзначыў, што існуе вялікая пагроза, што Рым унясе вэта супраць сямігадовага бюджэту ЭЗ, калі Брусэль ня прыме часткі абавязкаў, зьвязаных з наплывам імігрантаў.

Запазычанасьць Італіі – на ўзроўні 130 працэнт ВУП. Ад чэрвеня новы італьянскі ўрад ствараюць нацыяналісты (партыя "Ліга"), папулісты і эўраскептыкі з "Руху пяці зорак".