У Бэрне адкрылі дошку ў памяць аб польскіх дыпляматах, якія ратавалі габрэяў

У швэйцарскім Бэрне сёньня адкрылі мэмарыяльную дошку ў памяць аб польскіх дыпляматах, якія ўдзельнічалі ў ратаваньні габрэяў падчас Другой сусьветнай вайны. У цырымоніі адкрыцьця прыняў удзел старшыня Сэнату Польшчы Станіслаў Карчэўскі.

Аляксандр Ладась, Канстанты Ракіцкі, Юліюш Кюль і Стэфан Рыневіч друкавалі пашпарты, якія дазвалялі сотням габрэяў выжыць, а пазьней пакінуць тэрыторыю акупаванай Польшчы.

Станіслаў Карчэўскі падкрэсьліў, што пашпарты для габрэяў былі свайго роду «пропускам у жыцьцё». Паводле старшыні Сэнату, пра такія геройскія дзеяньні палякаў неабходна памятаць і распавядаць.

Мэмарыяльная дошка ўтрымлівае напісы па-ангельску й па-нямецку.

У часе вайны была створаная так званая Бэрнская група – нефармальны саюз польскіх дыпляматаў і прадстаўнікоў габрэйскіх арганізацый. Мэтай групы быў выпуск падробленых пашпартоў дзяржаў Лацінскай Амэрыкі. Дакумэнты дазвалялі габрэям перажыць ліквідацыю гета: уладальнікаў такіх пашпартоў вывозілі не ў канцлягеры, а ў лягеры для інтэрнаваных, дзе яны чакалі, калі іх абмяняюць на інтэрнаваных немцаў.

вс