На Гаваях уключылася сыстэма папярэджаньня аб ракетным удары

Некалькі нэрвовых гадзінаў перажылі жыхары Гаваяў і турысты, якія прыехалі туды адпачываць. На выспах памылкова была прыведзена ў дзеяньне супрацьпаветраная трывога. Прычыны інцыдэнту пакуль застаюцца невядомымі.

Жыхары й госьці Гаваяў атрымалі смс-кі з папярэджаньнем аб ракетным удары. У пасланьні падкрэсьлівалася, што гэта сапраўдная трывога, а не вучэньні. Паведамленьне выклікала паніку. Неўзабаве ўлады адмянілі сыгнал і выбачыліся за памылку.

«Няважна, ці гэта была звычайная памылка людзей, аварыя кампутара ці атака хакераў. Такія сытуацыі не павінныя паўтарацца», – заявіў журналістам сэнатар з Гаваяў Браян Шац (Brian Schatz). Пра інцыдэнт паведамілі прэзыдэнту Дональду Трампу, які знаходзіўся на Фларыдзе.

Гаваі, а таксама выспа Гуам – гэта тэрыторыі ЗША, якія знаходзяцца найбліжэй да Паўночнай Карэі, што робіць іх самымі лёгкімі цэлямі для магчымай ракетнай атакі. Сыстэма папярэджаньня аб ракетным удары была рэактываваная на Гаваях у мінулым годзе. Раней яна дзейнічала ў часы Халоднай вайны.

IAR/ап