Крэмль: «Мы ў стане абараніць свае базы ў Сірыі»

Расея мае дастаткова сілаў, каб абараніць ад атакаў тэрарыстаў свае вайсковыя базы ў Сірыі – заявіў у аўторак прэс-сакратар расейскага прэзыдэнта Дзьмітры Пяскоў. На працягу апошніх двух тыдняў базы Хмэймім і Тартус некалькі разоў падвяргаліся абстрэлам.

«Той кантынгент і тая вайсковая інфраструктура, якая засталася ў пунктах дысьлякацыі Хмэймім і Тартус маюць дастаткова сродкаў, каб адбіваць эпізадычныя атакі тэрарыстаў», – паведаміў прэс-сакратар Крамля.

Уначы з 6 на 7 студзеня расейскія вайсковыя базы былі атакаваныя бесьпілётнымі самалётамі. А ў навагоднюю ноч аэрадром у мясцовасьці Хмэймім быў абстраляны зь мінамётаў, у выніку чаго былі забітыя двое вайскоўцаў і зьнішчаныя некалькі самалётаў.

Незадоўга да гэтага Ўладзімер Пуцін заяўляў, што «незаконныя ўзброеныя фармаваньні тэрарыстычнай арганізацыі «Ісламская дзяржава» поўнасьцю зьнішчаныя», і аб’явіў пра вывад часткі расейскага кантынгенту з Сірыі.

IAR / ап