У Вільні для пэнсіянэраў у кафэ – бясплатная кава й гарбата

«Давайце сустрэнемся за кубачкам кавы» – прыкладна так можна перакласьці назву акцыі, якую праводзяць улады Вільні для таго, каб пажылыя людзі часьцей праводзілі вольны час у цэнтры гораду. Да 7 студзеня кавярні, гатэлі й рэстараны летувіскай сталіцы па нядзелях будуць частаваць пэнсіянэраў бясплатнай гарбатай і кавай, паведамляе зь летувіскай сталіцы карэспандэнт Польскага радыё.

Акцыя праходзіць ужо ў 17-ы раз. Яе пачаў праводзіць цяпер ужо былы мэр Вільні Артурас Зуокас. А ідэя прыйшла да палітыка, паводле яго слоў, калі ён быў у Францыі, у Парыжы, дзе ў нядзельны пасьляабедны час у цэнтры гораду ён бачыў вялікую колькасьць людзей пажылога ўзросту.

Сёлета ў віленскай акцыі бяруць удзел 82 аб'екты грамадзкага харчаваньня, якія маюць намер частаваць пэнсіянэраў гарачымі напоямі ня толькі па нядзелях, але і ў іншыя дні тыдня. Дастаткова прадʼявіць пэнсіённае пасьведчаньне.

Сьпіс кропак, якія далучыліся да акцыі, можна знайсьці на афіцыйным сайце Вільні.

вс