Варшава прасоўвае ініцыятыву Рэгіёну Трох мораў на Балканах

Міністар нацыянальнай абароны Польшчы Антоні Мацярэвіч сказаў, што польскія жаўнеры застануцца на Балканах. Пра гэта ён заявіў пасьля перамоў зь міністрам абароны Альбаніі Олтай Джачкай у Тыране. Нагадаем, на Балканах дыслакуецца некалькі сот польскіх жаўнераў і жандараў у рамках міратворчых місій.

Паводле словаў Мацярэвіча, гэты рэгіён Эўропы ў далейшым мае патрэбу ў падтрымцы міжнароднай супольнасьці.

У ходзе перамоў кіраўнікоў Мінабароны Польшчы й Альбаніі была закранутая тэма ініцыятывы Рэгіёну Трох мораў, якую прасоўвае Польшча. Яна заключаецца ў супрацы некаторых краін, якія знаходзяцца ў басэйне паміж трыма морамі: Балтыйскім, Чорным і Адрыятычным.
Паводле Мацярэвіча, Альбанія зь вялікім зацікаўленьнем адносіцца да ідэі супрацоўніцтва ў рамках ініцыятывы.

Падчас сустрэчы Антоні Мацярэвіч і Олта Джачка абмеркавалі, у прыватнасьці, пытаньні бясьпекі ў Эўропе й пагроз на ўсходнім флянгу НАТО. Польскі міністар падзякаваў Альбаніі за падтрымку батальёнаў баявой групы, якая дыслакуецца ў Латвіі і ў якой таксама выконваюць задачы польскія салдаты.

Антоні Мацярэвіч знаходзіцца на Балканах ад нядзелі. Візыт кіраўніка Мінабароны пачаўся з Харватыі. Наступным пунктам балканскай паездкі стане сустрэча зь кіраўніком Мінабароны Чарнагорыі.

вс