ФСБ Расеі пацьвердзіла, што затрымала ўкраінца Паўла Грыба

ФСБ Расеі пацьвердзіла, што затрымала 19-гадовага грамадзяніна Ўкраіны Паўла Грыба. 7 верасьня ўкраінскае Генэральнае консульства ў Растове-на-Доне атрымала афіцыйнае паведамленьне Ўпраўленьня ФСБ па Краснадарскім краі. Ім пацьвярджаецца ранейшая неафіцыйная інфармацыя, што Грыб знаходзіцца ў СІЗА ў Краснадары. Расейцы таксама праінфармавалі ўкраінскіх дыпляматаў, што хлопца затрымалі па абвінавачваньні ў зьдзяйсьненьні злачынства (тэракту), інфармуе УНІАН.

Афіцыйны прадстаўнік Дэпартамэнта консульскай службы МЗС Украіны Васіль Кірыліч паведаміў, што ўкраінская амбасада зьвернецца з афіцыйнай нотай у МЗС Расеі ды запатрабуе неадкладна забясьпечыць доступ украінскіх консулаў да затрыманага ўкраінца. Таксама ўкраінскі бок будзе патрабаваць інфармацыі пра прычыны і абставіны затрыманьня Грыба, пра ўмовы яго ўтрыманьня, пра забесьпячэньне яго права на адваката і неабходнымі мэдыкамэнтамі.

Дзе адбылося затрыманьне, ФСБ пакуль не ўдакладняе. Як вядома, хлопец 28 жніўня прыехаў у Беларусь на сустрэчу з дзяўчынай з Расеі і зьнік. Яго бацька, афіцэр-памежнік запасу, Ігар Грыб зьвярнуўся ў СМІ і заявіў, што сына захапілі расейскія спэцслужбы. КДБ Беларусі аднак адзначыў, што ў краіне могуць працаваць толькі беларускія спэцслужбы. Тым ня менш, у СМІ трапіла інфармацыя пра групу ФСБ Расеі, якая, нібыта, працуе ў Беларусі на пастаяннай аснове.

euroradio.fm/яс