Расея праводзіць вучэньні на ўсіх флятах

Міністэрства абароны Расеі абвясьціла вучэбную трывогу на караблях Касьпійскай флятыліі. Раней вучэньні былі праведзеныя на Балтыцы і ў чарнаморскім басэйне.

У манэўрах на Касьпіі прымаюць удзел 20 караблёў і 1500 жаўнераў. Расейскае камандаваньне правярае гатоўнасьць як флёту, так і войскаў берагавой абароны. Падчас вучэньняў ваенныя караблі трэніруюцца хутка выходзіць у мора, маскаваць пазыцыі, паражаць паветраныя цэлі.

Тыдзень таму Масква прывяла ў стан павышанай баявой гатоўнасьці войскі супрацьпаветранай абароны на Далёкім Усходзе Расеі. Гэтае рашэньне, аднак, было зьвязанае не з вучэньнямі, а з ростам напружанасьці на Карэйскім паўвостраве. Расея хоча быць падрыхтаванай і неадкладна адрэагаваць у выпадку, калі Паўночная Карэя і ЗША прыменяць супраць адна адной зброю.