Улады ЗША забаранілі дзяржустановам купляць праграмы Kaspersky Lab

Расея заяўляе, што рашэньне ЗША выдаліць Kaspersky Lab са сьпісу фірмаў, якія маюць права пастаўляць праграмы для амэрыканскай дзяржаўнай адміністрацыі, носіць палітычны характар. Такі крок улады ЗША зрабілі пасьля таго, як спэцслужбы заявілі, што праграмы фірмы Касьперскага дапамагаюць крамлёўскім хакерам атрымаць доступ да амэрыканскіх кампутарных сетак.

Kaspersky Lab – гэта адзін з самых буйных у сьвеце вытворцаў антывіруснага й антыхакерскага праграмнага забесьпячэньня. Прэс-сакратар прэзыдэнта Расеі Дзьмітры Пяскоў заявіў у сераду, што Kaspersky Lab – гэта поўнасьцю прыватная фірма й аказвае толькі камэрцыйныя паслугі. Пры гэтым ён зазначыў, што расейскія ўлады будуць абараняць інтарэсы расейскіх фірмаў за мяжой.

Расьследаваньнем магчымых сувязяў Kaspersky Lab з Крамлём і расейскімі спэцслужбамі займалася ФБР. Гэтая тэма абмяркоўвалася і ў Сэнаце ЗША. Інфармагенцтва Bloomberg у апублікаваным у аўторак артыкуле паведаміла, што фірма Касьперскага рэалізавала праект для Фэдэральнай службы бясьпекі Расеі. Дырэктар фірмы Яўген Касьперскі абверг абвінаывачаньні ў супрацоўніцтве з расейскімі спэцслужбамі, назваўшы іх «неабгрунтаванымі тэорыямі змовы» й «поўнай лухтой».

IAR/ап