МЗС РФ: Расея атрымала ад Януковіча просьбу ўвесьці войска ва Ўкраіну

У 2014 годзе Расея атрымала ад былога прэзыдэнта Віктара Януковіча падпісаную заяву з просьбай увесьці расейскія войскі ва Ўкраіну для ўрэгуляваньня сытуацыі ў краіне. Пра гэта заявіла афіцыйны прадстаўнік МЗС Расеі Марыя Захарава.

Яна падкрэсьліла, што заява была аформленая ня ў выглядзе ліста, але заўважыла, што сам Януковіч „ніколі не адмаўляў, што яе падпісваў”.

Захарава таксама пацьвердзіла, што 3 сакавіка 2014 году сталы прадстаўнік Расеі ў ААН Віталь Чуркін быў упаўнаважаны прад'явіць заяву Януковіча на паседжаньні Рады Бясьпекі.

16 сакавіка 2017 году прадстаўнік Крамля Дзьмітрый Пяскоў заявіў, што расейскі прэзыдэнт Уладзімер Пуцін не атрымліваў ад Януковіча лістоў з просьбай аб уводзе войскаў. Пры гэтым у 2014 годзе сам Пуцін казаў, што ўкраінскі прэзыдэнт зьвяртаўся да яго з такой просьбай.

Пытаньне аб дакумэнце з просьбай увесьці войскі абмяркоўваецца ў сувязі з тым, што ва Ўкраіне ён зьяўляецца асновай абвінавачваньня Януковіча ў дзяржаўнай здрадзе. Позва па гэтай справе ў сакавіку была пададзеная ў кіеўскі суд.
У сваю чаргу сам Януковіч заяўляе, што ніякага ліста не было й ён уводзіць войскі ў Расеі не прасіў.

meduza.io/аz