Нямеччына будзе выступаць за высокія тэхстандарты БелАЭС

"Нямецкі бок будзе выступаць за як мага больш высокія тэхнічныя стандарты АЭС у Беларусі", — заявіла канцлер Нямеччыны Ангела Мэркель на сустрэчы з прэм'ер-міністрам Летувы Саўлюсам Сквернялісам 23 лютага ў Бэрліне.

"Пэўны непакой ў Летувы выклікае будаўніцтва атамнай станцыі ў Беларусі, — сказала канцлер. — Няважна, жывеш ты ў непасрэднай блізкасьці або далёка — пасьля Чарнобыля мы, зразумела, ведаем, што бясьпека атамных станцый мае вырашальнае значэньне".

На пытаньне пра магчымасьць блякаваньня будаўніцтва Беларускай АЭС Мэркель заявіла: "Трэба зьвяртаць увагу на гарантыю захаваньня тэхнікі бясьпекі. Мы можам толькі зноў і зноў казаць пра тое, што ёсьць міжнародныя інспэктары, якія могуць агледзець будоўлю і азнаёміцца зь лічбамі".

Ядзерная бясьпека зьяўляецца для Летувы "пытаньнем выжываньня, бо непадалёк будуецца небясьпечная АЭС", заявіў прэм'ер-міністар Саўлюс Скверняліс. Паводле яго слоў, у яго была задача на перамовах з Мэркель прадставіць рэальную сытуацыю. Пагрозы, якія ўзьніклі ў сувязі з будаўніцтвам АЭС — гэта праблема не паміж Летувой і Беларусьсю; яна выходзіць за межы рэгіёна і павінна вырашацца "на іншым узроўні", лічыць кіраўнік літоўскага кабінэта.

БелаПАН/яс