Польскі блёгер атрымаў кампэнсацыю за бойку на тэлебачаньні

Польскі блёгер Томаш Мацяйчук атрымаў кампэнсацыю ў памеры 50 тысяч расейскіх рублёў (каля 775 даляраў) ад тэлеканала ТВЦ пасьля таго, як яго ўдарылі ў эфіры праграмы «Права голасу». Пра гэта ён распавёў тэлеканалу Дождь.

У лістападзе падчас здымак праграмы «Права голасу» Мацяйчук заявіў, што «украінцы таксама хочуць жыць як нармальныя людзі, а не ў лайне, як вы [расейцы]». Вядучы праграмы Рома Бабаян сказаў яму, каб той «пайшоў адсюль нафіг». Затым Мацейчука абступілі госьці студыі, адзін з якіх ударыў яго па твары.

«Тэлеканал ТВЦ папрасіў прабачэньня і даў мне кампэнсацыю — 50 тысяч рублёў. Я хачу перадаць гэтыя грошы прытулку для жывёл», — распавёў Мацяйчук.
Пры гэтым ён прызнаў, што яму ня варта было прамаўляць фразу пра тое, што расейцы «жывуць у лайне». «Я ўсьведамляю сваю памылку і разумею, што гэтае слова не павінна было зьявіцца ў эфіры. Але я проста ня вытрымаў. Я тут знаходжуся ўжо трэці тыдзень і ўвесь час чую абразы», — сказаў блёгер.

Дарэчы, у польскім журналісцкім асяродзьдзі Мацяйчука многія лічаць даволі падазронай асобай і правакатарам. А ў красавіку 2016 года Служба бясьпекі Ўкраіны забараніла Мацейчуку ўезд у краіну на пяць гадоў. Незадоўга да гэтага ў Амстэрдаме ён спытаў у міністра замежных спраў Украіны Паўла Клімкіна, што ўкраінскія ўлады збіраюцца рабіць з нацыяналістычнай арганізацыяй Misanthropic Division, члены якой уваходзілі ў склад батальёна «Азоў».

Дождь/нг