Беларус Ігар Бокій атрымаў шосты залаты мэдаль на Паралімпіядзе ў Рыё

Беларус Ігар Бокій атрымаў шосты залаты мэдаль на Паралімпіядзе ў Рыё-дэ-Жанэйра. У заключны дзень турніру для слабавідушчых плыўцоў ён выйграў на дыстанцыі 100 мэтраў на сьпіне й паставіў сусьветны паралімпійскі рэкорд у гэтай дысцыпліне – 56,68 сэк. Другое месца атрымаў украінец Яраслаў Дзенісенка, а трэцяе – у канадца Нікаляса Гая Турбідэ.

Раней беларускі плывец-паралімпіец перамагаў на дыстанцыях 100 мэтраў батэрфляем, 200 мэтраў комплексным плаваньнем, 50, 100 і 400 мэтраў вольным стылем. Таксама ён атрымаў бронзу на дыстанцыі 100 мэтраў брасам.

Ігар Бокій удзельнічаў таксама ў Паралімпіядзе ў Лёндане, на якой заваяваў 5 чэмпіёнскіх тытулаў. Такім чынам, ён мае ўжо 11 залатых паралімпійскіх мэдалёў.

Усяго беларусы-паралімпійцы заваявалі на Гульнях у Рыё 10 мэдалёў (8 залатых і 2 бронзавых). Апроч Бокія, золата заваявалі плывец Уладзімір Ізотаў і шпажыст-калясачнік Андрэй Праневіч. Бронзу таксама заваяваў кідальнік кап’я Аляксандр Трыпуць.

Сёньня, 18 верасьня, адбудзецца закрыцьцё Паралімпіяды ў Рыё.

эўрарадыё/вс