Сырыйскую апазыцыю не запрасілі ў Вену

Сырыйская апазыцыя не атрымала запрашэньня на міжнародныя перамовы ў Вену, падчас якіх абмяркоўваецца будучыня Сырыі.

Увечары ў сталіцы Аўстрыі пачалася міжнародная канфэрэнцыя з удзелам прадстаўнікоў сусьветных дзяржаў, у тым ліку Ірана, Саудаўскай Арабіі, Турцыі й Эгіпта.

Камэнтатары падкрэсьліваюць, што ўпершыню прадстаўнікі Ірана селі за адзін стол з амэрыканцамі й размаўляюць аб будучыні Сырыі.

Джордж Сабра з Нацыянальнай кааліцыі на карысьць сырыйскай апазыцыі й рэвалюцыйных сілаў, якую падтрымлівае Захад, заявіў, што ні адзін з праціўнікаў Башара Асада не атрымаў запрашэньня на перамовы.

Дарэчы, гэта менавіта сырыйская апазыцыя вуступае супраць удзелу Тэгерана ў перамовах па Сырыі.

У выніку грамадзянскай вайны ў Сырыі загінула па меншай меры 250 тысяч чалавек. З краіны зьбеглі каля 10 мільёнаў чалавек.

Нягледзячы на шматлікія сустрэчы й перамовы, а таксама дзьве мірныя канфэрэнцыі міжнароднай супольнасьці пакуль не ўдалося пакласьці канец насільля ў краіне.

аз