Абама сустрэўся з Далай-ламам

Гэта была трэцяя сустрэча амэрыканскага прэзыдэнта з духоўным лідарам Тыбэту.

Візыт Далай-ламы ў Барака Абамы прайшоў без удзелу прэсы. Белы дом апублікаваў здымак з сустрэчы, якая адбылася ў Залі мапаў ды выдаў камунікат.

У камунікаце адзначаецца, што прэзыдэнт ЗША выказаў падтрымку для захаваньня рэлігійнай, культурнай ды моўнай традыцыі Тыбэту, а таксама пашанаваньня правоў тыбэтцаў у Кітайскай Народнай Рэспубліцы.

Барак Абама заклікаў афіцыйны Пэкін да перамоваў з жыхарамі Тыбэту. Белы дом заявіў, што Далай-лама не імкнецца да аддзяленьня Тыбэту ад Кітая, а спадзяецца ў першую чаргу на дыялёг з афіцыйным Пэкінам.

У сваю чаргу яшчэ напярэдадні візыту кітайскія ўлады выказалі сваё незадавальненьне ды заклікалі Абаму адмяніць сустрэчу.

юл