Браты-мусульмане заклікаюць апазыцыю здацца

У суботу на рэфэрэндуме бальшыня эгіпцян, праўдападобна, падтрымала праект Канстытуцыі, падрыхтаваны Братамі-мусульманамі ды іншымі мусульманскімі арганізацыямі. Апазыцыя, якой праект асноўнага дзяржаўнага дакумэнта не задавальняе, заяўляе аб чарговых пратэстах.

Паводле Братоў-мусульманаў, у першы дзень рэфэрэндуму адносна праекту Канстытуцыі „за” выказаліся амаль 60% эгіпцян. Кіроўная партыя заклікае апазыцыю не арганізаваць пратэстаў.

У суботу прагаласавалі жыхары дзесяці правінцыяў, у тым ліку Каіра й Александрыі. Жыхары астатніх правінцый пойдуць да вурнаў у наступную суботу. Гэта пераважна жыхары малых мястэчак і вёсак, і бальшыня зь іх, праўдападобна, падтрымае праект Канстытуцыі. Ён у вялікай ступені грунтуецца на мусульманскім рэлігійным праве й дае шырокія паўнамоцтвы прэзыдэнту.

яс