Усьлед за Эстоніяй Польшча не пускае ў свае воды расейскі парусьнік

Польшча вырашыла не пускаць у свае тэрытарыяльныя вады расейскі парусьнік «Седов», на якім знаходзяцца курсанты Керчанскага дзяржаўнага марскога тэхналягічнага ўнівэрсытэта. Пра гэта заявіла прадстаўнік польскага міністэрства замежных спраў Эва Сувара.

«Мы лічым, што допуск парусьніка ў тэрытарыяльныя вады Польшчы супярэчыў бы палітыцы павагі да тэрытарыяльнай цэласнасьці Украіны і непрызнаньня анэксіі Крыму», – сказала дыпляматка. Яна адзначыла, што падобнае рашэньне было прынята прэм'ер-міністрам краіны Матэвушам Маравецкім.

Напярэдадні расейскі парусьнік з курсантамі з Крыма не пусьціла ў свае тэрытарыяльныя воды Эстонія. У эстонскім міністэрстве замежных спраў заявілі, што гэта супярэчыць палітыцы Эстоніі аб непрызнаньні Крыма расейскай тэрыторыяй.

У амбасадзе Расеі ацанілі тое, што адбылося як «несяброўскі акт эстонскіх уладаў».

ПР/юл