У Польшчы танее электрычнасьць

З суботы ў Польшчы дзейнічае новы тарыф энэргаапэратара фірмы «Enea», зацьверджаны ў сакавіку кіраўніком Упраўленьня па рэгуляваньні энэргетыкі.

Дыстрыбʼютар паведаміў, што хатнія гаспадаркі будуць сёлета плаціць на 7,4% менш за пастаўкі электраэнэргіі.

Зьніжэньне тарыфаў вынікае, у прыватнасьці, са зьмяншэньня ставак тарыфу за перасыл энэргіі, згодна з прынятымі ў сьнежні мінулага года папраўкамі ў закон. Новы тарыф будзе дзейнічаць да 31 сьнежня 2019 года.

Кампанія паведаміла ў прэс-рэлізе, што, у адпаведнасьці з новымі стаўкамі тарыфаў за перасыл электраэнэргіі цэны для ўсіх тарыфных груп скароцяцца ў сярэднім на 3,3%. Найбольшае зьніжэньне збораў адчуюць хатнія гаспадаркі.

Апэратар «Enea» зьяўляецца адным з чатырох найбуйнейшых дыстрыбʼютараў электраэнэргіі ў Польшчы. Кампанія пастаўляе электраэнэргію 2,6 мільёнам кліентаў у паўночна-заходняй частцы краіны. Летась кампанія паставіла больш 19,9 мільярдаў кВт/г. электраэнэргіі.

ПР/юл