Польшча часова адновіць памежны кантроль у Шэнгенскай зоне

МУС Польшчы хоча часова вярнуць памежны кантроль, падчас кліматычнай канфэрэнцыі COP24 у Катавіцэ . Падобныя рашэньні былі выкарыстаныя ў Польшчы падчас Эўра-2012, канфэрэнцыі па клімаце ў Варшаве ў 2013 годзе, падчас саміту NATO і Сусьветных дзён моладзі ў 2016 годзе.

МУС плянуе аднавіць памежны кантроль з 22 лістапада па 16 сьнежня на ўнутранай мяжы Шэнгенскай зоны. Гаворка ідзе пра мяжу з Нямеччынай, Чэхіяй, Славакіяй і Летувой, а таксама ў аэрапортах і марскіх партах.

Кантроль будзе ажыцьцяўляцца выпадковым чынам, інакш, чым на зьнешняй мяжы Эўрапейскага Зьвязу.

Грамадзяне краін Шэнгенскай зоны павінны мець з сабой пашпарт. Грамадзяне трэціх краін павінны мець пашпарт і пацьвярджэньне права на знаходжаньне ў Польшчы або візу.

Канфэрэнцыя ў Катавіцах пройдзе 3-14 сьнежня. Але многія мерапрыемствы пачнуцца ўжо 26 лістапада.

У мерапрыемстве прымуць удзел больш за 30 000 чалавек з амаль 200 краін, у тым ліку палітыкі, прадстаўнікі няўрадавых арганізацый, навуковых колаў і бізнэсу.

яс