У Чанстахову вернікі паломнічаюць нават на роліках

Каля 100 000 чалавек прынялі ўдзел 15 жніўня ў сьвяце Ўнебаўзяцьця Найсьвяцейшай Панны Марыі на Яснай Гары ў Чанстахове. Сюды прыбылі 52 пешыя паломніцтвы.

Найважнейшым момантам цырымоніі стала набажэнства, якое адслужыў папскі нунцый у Польшчы арцыбіскуп Сальваторэ Пэнак’ё. Нунцый перадаў вернікам блаславеньне ад папы.

Мітрапаліт чанстахоўскі арцыбіскуп Вацлаў Дэпа напомніў у казані пра перамогу 15 жніўня 1920 года польскага войска над бальшавікамі пад Варшавай: «Гэта быў прарыўны момант для абароны эўрапейскай цывілізацыі, у якой мы жывём на працягу многіх пакаленьняў». Гэта падзея называецца яшчэ “цудам на Вісьле” і вернікі лічаць, што перамога невыпадкова была дасягнута ў сьвята Ўнебаўзяцьця Найсьвяцейшай Панны Марыі. Маўляў, сама Марыя дапамагла палякам адолець Савецкую Расею.

Сэзон паломніцтва на Ясную Гару пачынаецца ў сярэдзіне траўня і доўжыцца да канца верасьня. Галоўныя кульмінацыйныя моманты — гэта 15 і 26 жніўня.

У апошнія гады назіраецца рост папулярнасьці ня толькі пешых, але і іншых форм паломніцтва. Вернікі накіроўваюцца на Ясную Гару на роварах і нават на роліках.

IAR/вк