Пашыраецца магчымасьць безнаяўнага плацяжу ў дзяржаўных установах

У Польшчы пашыраецца магчымасьць безнаяўнага плацяжу ў дзяржаўных установах.

Ужо ў палове дзяржаўных установаў можна заплаціць крэдытнай картай або праз тэлефон. Безнаяўна можна таксама выплаціць штраф дарожнай інспэкцыі. Больш за год ажыцьцяўляецца праграма пашырэньня безнаяўных плацяжэй у дзяржаўнай адміністрацыі. Праграму рэалізуе Міністэрства прадпрымальніцтва і тэхналёгій і Нацыянальная палата разьлікаў. Намесьнік старшыні Нацыянальнай палаты разьлікаў Дарыюш Марц'яш (Dariusz Marcjasz) сказаў, што гэтая праграма ажыцьцяўляе ідэю «лічбавай» Польшчы.

Д.Марц’яш: Дзяржаўныя ўстановы і кліенты вельмі добра ўспрынялі праграму. За апошнія 14 месяцаў заяўку аб далучэньні да праграмы падалі 1500 адзінак. 1250 зь іх вырашылі купіць тэрміналы і ўжо падпісалі дамову. Я хачу адзначыць, што ў кожным пастарунку паліцыі ёсьць тэрмінал і можна на месцы заплаціць безнаяўнымі.

Міністэрства прадпрымальніцтва і тэхналёгій лічыць, што праграма зьяўляецца важным крокам у працэсе стварэньня сучаснай і эфэктыўнай дзяржаўнай інтэрнэтнай адміністрацыі ў Польшчы.

яс