Польскія аграсядзібы рэклямуюцца за мяжой

Аграсядзібы з Mалапольскага ваяводзтва (поўдзень Польшчы) пачынаюць рэклямную кампанію за мяжою.

Гаворка ідзе пра сетку адмысловых аб’ектаў, якія знаходзяцца на шляхах для турыстаў: «Малапольская вёска ў сядле», «Малапольская вёска для пажылых», «Малапольская вёска для дзяцей» ды іншыя. Турысты з іншых краін усё часьцей выбіраюць адпачынак на вёсцы, асабліва ў сядзібах, дзе можна харчавацца мясцовымі прадуктамі, пазнаёміцца з традыцыяй, гісторыяй ды кухняй.

Каталёгі польскіх аграсядзіб паявяцца на кірмашы турызму заўтра ў Лёндане, а пад канец месяца – у Барсэлёне. У будучым годзе польскія аграсядзібы будуць рэклямаваць свае паслугі на кірмашы ў Маскве, Бэрліне ды Мадрыдзе.

У мінулым годзе Малапольшчу наведала амаль 15 млн. турыстаў, у тым ліку каля трох мільёнаў з-за мяжы.