Анджэй Дуда павіншаваў Янаша Адэра з перавыбраньнем кіраўніком Вугоршчыны

Прэзыдэнт Польшчы Анджэй Дуда павіншаваў Янаша Адэра з перавыбраньнем на пасаду прэзыдэнта Вугоршчыны. У тэлеграме кіраўніку Вугоршчыны польскі прэзыдэнт падкрэсьліў значэньне ўзаемапавагі й дружбы паміж дзьвюма дзяржавамі.

«Вас паважаюць і любяць ня толькі вугорцы, але й мае суайчыньнікі», – напісаў Анджэй Дуда. Кіраўнік Польшчы падкрэсьліў, што для Польшчы Вугоршчына застаецца важным партнэрам. Ён выказаў надзею на тое, што дзяржавы будуць разьвіваць ня толькі двухбаковае супрацоўніцтва, але й супрацоўніцтва на міжнародным узроўні, а таксама ў рамках рэгіянальных ініцыятываў.

Нагадаем, 13 сакавіка Янаш Адэр быў пераабраны парлямэнтам Вугоршчыны на другі прэзыдэнцкі тэрмін.

Праз два тыдні Анджэй Дуда й Янаш Адэр разам прымуць удзел у Днях польска-вугорскай дружбы ў горадзе Пётркаў-Трыбунальскі (цэнтральная Польшча).

Янаш Адэр нарадзіўся ў 1959 годзе. Закончыў Будапэшцкі ўнівэрсытэт, доктар юрыдычных навук. Член правай партыі «Фідэс» прэмʼер-міністра Вугоршчыны Віктара Орбана.

вс