У панядзелак пачынаецца конская выстаўка-кірмаш у Скарышэве

Гэта найстарэйшая й найбуйнейшая гэткага роду ярмарка ў Польшчы і адна з найбольшых у Эўропе.

Няўрадавыя арганізацыі б’юць трывогу, што на гэтым мерапрыемстве штогод парушаюцца правы жывёл, а коні трапляюць адтуль у бойні паўднёвай Эўропы.

Фонд «Віва» чакае, што ў новы закон аб абароне жывёл будзе ўнесена палажэньне, што конь не зьяўляецца жывёлай для забою.

«Шматлікія пэтыцыі ў гэтай справе падпісалі больш за адзін мільён палякаў. Такое рашэньне паставіла б Польшчу на першых месцах краін, якія клапоцяцца пра жывёл. Няма ніякіх аргумэнтаў супраць, таму што гэта невялікая галіна эканомікі. Коні часта прадаюцца без кантрактаў і дзяржава не атрымлівае ад гэтых зьдзелак падаткаў«, – зазначае старшыня фонду «Віва».

Акрамя Скарышэва ў цэнтральнай Польшчы, конскія кірмашы адбываюцца яшчэ ў некалькіх мясцовасьцях краіны.

Фонд «Тара» арганізаваў збор сродкаў праз Інтэрнэт. Мэтай зьяўляецца купля ўсіх коней на рынку ў Скарышеве.

яс