У Польшчы абнаўляецца чыгуначны рухомы склад

Рэгіянальная кампанія «Малапольская чыгунка» (Koleje Małopolskie) набыла шэсьць новых цягнікоў «Імпульс». Згаданыя склады выпускае польская фірмы «Нэваг» (Newag), офіс і вытворчасьць якой знаходзіцца ў горадзе Новы Сонч (Nowy Sącz) у Малапольскім ваяводзтве.

Кампанія закупіла два чатырохсэкцыйныя цягнікі рэгіянальных ліній, якія могуць перавезьці 200 пасажыраў, і чатыры пяцісэкцыйныя, якія памяшчаюць 250 пасажыраў. Вагоны абсталяваныя кандыцыянэрам, эрганамічнымі крэсламі, бесправадным інтэрнэтам і электроннай інфармацыйнай сыстэмай. Цягнікі могуць разьвіваць хуткасьць да 130 км/г і будуць абслугоўваць трасы паміж Кракавам і важнейшымі гарадамі рэгіёну (Новы Сонч, Тарнаў).

У трасы склады выйдуць 11 сьнежня. Да канца лютага наступнага года Малапольская чыгунка атрымае чарговыя сем «Імпульсаў». Агульны кошт кантракту – 300 млн злотых (68 млн эўра).

Малапольская чыгунка створаная ў 2013 годзе для ажыцьцяўленьня рэгіянальных пасажырскіх перавозак на тэрыторыі Малапольскага ваяводзтва з адміністрацыйным цэнтрам у Кракаве. Цягнікі кампаніі заходзяць таксама ў некаторыя населеныя пункты суседніх ваяводзтваў. Уладальнікам кампаніі зьяўляюцца муніцыпальныя ўлады рэгіёну. У 2015 годзе цягнікі фірмы перавезьлі больш за 1 млн 800 тыс. пасажыраў.

вс