Варшаўскі аэрапорт эвакуявалі з-за паведамленьня пра бомбу

Апоўначы зь нядзелі на панядзелак (з 27 на 28 сакавіка) праваахоўныя службы эвакуявалі сталічны аэрапорт «Варшава-Модлін» (Warszawa-Modlin). Прычынай эвакуацыі стала паведамленьне пра нібыта падкладзеную ў аэрапорце бомбу.

Рэйсы з ірляндзкіх Дубліна й Шанана, італьянскага Бэргама й польскага Гданьска былі перанакіраваныя ў іншы варшаўскі аэрапорт імя Фрыдэрыка Шапэна. У выніку праверкі аб'екту спэцыялістамі аказалася, што паведамленьне пра бомбу зьяўляецца несапраўдным.
Паводле неафіцыйнай інфармацыі, паліцыя ўжо затрымала мужчыну, які паведаміў пра нібыта падкладзеную бомбу.

Нагадаем, у польскай сталіцы ёсьць два грамадзянскія аэрапорты: разьмешчаны ў межах горада аэрапорт імя Фрыдэрыка Шапэна й аэрапорт «Модлін», які знаходзіцца па-за рысай Варшавы. Цяпер «Модлін» выкарыстоўваецца выключна адной авіякампаніяй - нізкатарыфнымі авіялініямі «Ryanair». Аэрапорт імя Шапэна ў сваю чаргу – гэта адзін буйнейшых у нашым рэгіёне Эўропы.

вс