Польшча спадзяецца разьмясьціць у сябе ваенныя базы NATO

Міністар абароны Польшчы Антоні Мацярэвіч заявіў, што для яго ведамства самай важнай падзеяй бліжэйшага часу зьяўляецца саміт NATO ў Варшаве, плянаваны на ліпень. Падчас сустрэчы будзе прынятае рашэньне пра магчымасьць разьмяшчэньня ў Польшчы натаўскіх ваенных баз.

«На саміце ў Варшаве будзе прынятае рашэньне, ці Польшча зьяўляецца нармальным, паўнапраўным сябрам NATO, ці Польшчы датычаць тыя ж самыя крытэры, як адносна Нямеччыны, Францыі, Бэльгіі, Галяндыі ды іншых краін. Гаворка ідзе пра магчымасьць разьмяшчэньня на нашай тэрыторыі амэрыканскіх баз», – сказаў міністар абароны.

Мацярэвіч падкрэсьліў, што іншыя дзяржавы могуць самастойна вырашаць пра пастаянную прысутнасьць на іх тэрыторыі жаўнераў зь дзяржавы NATO. У сваю чаргу Польшчы ўскладняе прыняцьце такога рашэньня Нямеччына. А якраз Польшча, якая зьяўляецца франтавой дзяржавай альянсу, падвяргаецца найбольшай пагрозе нападзеньня звонку.

ПР/нг